Të nderuar kolegë,
Me rastin e fillimit të detyrës sime si UD. drejtor i shkollës, dëshiroj t’ju përshëndes përzemërsisht dhe t’ju shpreh respektin tim për punën, përkushtimin dhe kontributin që secili prej jush jep çdo ditë për shkollën dhe nxënësit tanë.
E marr këtë detyrë me përgjegjësi të madhe, por edhe me besimin se së bashku mund të ndërtojmë një mjedis edhe më të mirë profesional, arsimor dhe njerëzor.
Besoj fuqimisht se suksesi i një shkolle nuk varet vetëm nga drejtori, por nga puna e përbashkët e të gjithë kolektivit. Prandaj, në periudhën që kemi përpara, dua të kemi më shumë bashkëpunim, komunikim të hapur, mirëkuptim dhe respekt të ndërsjellë.
Dera ime do të jetë e hapur për secilin prej jush, për ide, sugjerime, shqetësime dhe iniciativa që mund të ndikojnë në përmirësimin e punës sonë. Do të përpiqem që vendimet tona të udhëhiqen nga profesionalizmi, përgjegjësia, transparenca dhe, mbi të gjitha, nga interesi i nxënësve dhe i shkollës.
Na pret një vit i ri shkollor me sfida, por edhe me shumë mundësi. Jam i bindur se me një kolektiv të bashkuar, me vullnet dhe me punë të përbashkët, do t’i përballojmë me sukses.
Ju uroj një vit shkollor të mbarë, të suksesshëm dhe me sa më shumë arritje!
Me respekt dhe konsideratë,
UD. Drejtori
Semir Sejdini