Shoferët që udhëtojnë përmes Sllovenisë gjatë fundjavës së 14 dhe 15 nëntorit 2026 do të përballen me kufizime të shumta në trafik, për shkak të reshjeve të borës në Kroaci, erërave të forta, përmbytjeve dhe punimeve në rrugë. Autoritetet sllovene kanë paralajmëruar mbylljen e plotë të një segmenti të autostradës H4 drejt Italisë, ndërsa në disa pika kufitare me Kroacinë janë vendosur kufizime për automjetet e transportit të mallrave.
Sipas Qendrës Sllovene të Informacionit të Trafikut, të shtunën, më 14 nëntor, për shkak të kushteve dimërore në anën kroate, në pikat kufitare Petrina dhe Babno Polje është ndaluar qarkullimi i automjeteve me rimorkio dhe gjysmërimorkio. Këto kufizime nuk vlejnë automatikisht për veturat e zakonshme të udhëtarëve.
Vështirësi janë raportuar edhe në autostradën H4, ndërmjet Nanos dhe Ajdovščinës, ku erërat e fuqishme kanë shkaktuar kufizime për karvanët, kamionët frigoriferikë dhe automjetet me mbulesë pëlhure. Autoritetet paralajmërojnë se kufizimet mund të ndryshojnë gjatë ditës, varësisht nga intensiteti i erërave.
Për shkak të përmbytjeve të ditëve të fundit, disa rrugë vazhdojnë të mbeten të mbyllura. Ndër to janë rruga rajonale Grgelj–Fara, në segmentin Fara–Žlebi, dhe rruga lokale Bukovica–Renče. Në zonat e prekura nga reshjet ekziston gjithashtu rreziku i rrëshqitjeve të dheut dhe gurëve
Një nga kufizimet më të rëndësishme pritet të hyjë në fuqi të dielën, më 15 nëntor, në orën 05:00, kur autostrada H4 ndërmjet nyjës Nanos dhe daljes Vipava do të mbyllet plotësisht në të dy drejtimet.
Mbyllja është planifikuar të zgjasë deri të hënën, më 16 nëntor, në orën 05:00, për shkak të largimit të sinjalistikës dhe pajisjeve të përkohshme të punimeve. Trafiku do të devijohet në rrugën rajonale Razdrto–Vipava.
Ndërkohë, të shtunën janë paralajmëruar edhe mbyllje në rrugën Domžale–Šentjakob, në zonën e Podgoricës, deri në orën 18:00, si dhe në rrugën Predel–Bovec, pranë fortesës Kluže, nga ora 08:00 deri në 14:30. Punimet vazhdojnë edhe në autostradën A1, ku zona e pushimit Ravbarkomanda dhe disa hyrje e dalje në Postojna pritet të mbeten të mbyllura deri në fund të nëntorit.
Kufizimet janë me rëndësi për mërgimtarët nga Kosova që udhëtojnë drejt Italisë, Austrisë, Gjermanisë apo kthehen në vendlindje përmes Sllovenisë dhe Kroacisë. Shoferëve u rekomandohet të kontrollojnë gjendjen e rrugëve para nisjes, të respektojnë sinjalistikën dhe të marrin parasysh vonesat e mundshme. Nga e diela, 15 nëntor, në Slloveni fillon edhe periudha e detyrueshme e pajisjeve dimërore për automjetet. /Urgjent.com/