Nga 19 dhjetori nis linja direkte Trieste–Prishtinë
Bashkatdhetarët që jetojnë në veri të Italisë dhe në Slloveni do të kenë një mundësi të re për të udhëtuar drejt Kosovës, pasi kompania ajrore Wizz Air do të nisë fluturimet direkte ndërmjet Triestes dhe Prishtinës nga 19 dhjetori 2026.
Sipas njoftimit zyrtar të Wizz Air dhe Aeroportit të Triestes, linja e re do të funksionojë dy herë në javë gjatë sezonit dimëror, çdo të martë dhe të shtunë. Gjatë sezonit veror, numri i fluturimeve është planifikuar të rritet në tri në javë, përkatësisht të martën, të enjten dhe të shtunën.
Biletat tashmë janë në shitje përmes faqes zyrtare dhe aplikacionit të kompanisë Wizz Air, ndërsa çmimet fillestare të shpallura nisin nga 19,99 euro për një drejtim.
Fluturimi ndërmjet dy aeroporteve pritet të zgjasë rreth një orë e 25 minuta, duke ofruar një lidhje të drejtpërdrejtë ndërmjet Kosovës dhe rajonit Friuli-Venezia Giulia në Itali.
Linja Trieste–Prishtinë pritet të jetë veçanërisht e dobishme për shqiptarët që jetojnë në Slloveni, ku mundësitë e fluturimeve direkte nga Ljubljana drejt Prishtinës kanë qenë të kufizuara.
Aeroporti i Triestes, i njohur zyrtarisht si Aeroporto Friuli Venezia Giulia, ndodhet në Ronchi dei Legionari, afërsisht 30 kilometra larg qytetit të Triestes. Nga Ljubljana, aeroporti mund të arrihet me veturë për rreth një orë e 15 minuta deri në një orë e gjysmë, varësisht nga trafiku dhe kushtet e udhëtimit.
Afërsia gjeografike e bën atë një alternativë për bashkatdhetarët nga Ljubljana, Postojna, Koperi, Nova Gorica dhe qytete të tjera të Sllovenisë, të cilët dëshirojnë të udhëtojnë drejt Kosovës pa ndalesa në aeroporte të tjera. Për udhëtarët që nuk përdorin veturë, Aeroporti i Triestes ka edhe lidhje me transportin publik. Pranë terminalit ndodhet stacioni hekurudhor Trieste Airport, i lidhur me ndërtesën e aeroportit përmes një kalimi të posaçëm për këmbësorë.
Hekurudhat Sllovene ofrojnë mundësi udhëtimi nga Ljubljana drejt Triestes dhe aeroportit, me ndërrime sipas linjës së zgjedhur. Sipas çmimores së publikuar nga kompania, bileta standarde njëdrejtimëshe Ljubljana–Trieste Airport kushton 14,80 euro, ndërsa orari dhe çmimi duhet të kontrollohen para nisjes.
Përveç atyre në Slloveni, fluturimet e reja do t’u krijojnë mundësi shtesë udhëtimi edhe shqiptarëve që jetojnë në Trieste, Udine, Gorizia, Monfalcone dhe zonat përreth. Kjo lidhje mund të shfrytëzohet për udhëtime familjare, pushime, vizita gjatë festave të fundvitit dhe udhëtime të tjera ndërmjet Italisë dhe Kosovës.
Nisja e fluturimeve më 19 dhjetor përkon edhe me periudhën kur një numër i madh i bashkatdhetarëve udhëtojnë drejt Kosovës për festat e fundvitit. Linja do të funksionojë në të dy drejtimet, duke u mundësuar edhe udhëtarëve nga Kosova të fluturojnë drejtpërdrejt drejt Triestes, prej nga mund të vazhdojnë udhëtimin në qytete të tjera italiane ose drejt Sllovenisë.
Megjithëse çmimet e shpallura fillojnë nga 19,99 euro, ato nuk janë fikse për çdo datë dhe mund të ndryshojnë sipas kërkesës dhe disponueshmërisë së vendeve. Në tarifën bazë të Wizz Air përfshihet një çantë e vogël dore, me përmasa maksimale 40 × 30 × 20 centimetra, e cila duhet të vendoset nën ulësen e pasagjerit.
Me nisjen e kësaj linje, Trieste do t’i shtohet rrjetit të aeroporteve nga të cilat qytetarët dhe bashkatdhetarët mund të udhëtojnë drejtpërdrejt drejt Prishtinës, duke zgjeruar alternativat për lidhjet ajrore ndërmjet Kosovës, Italisë dhe Sllovenisë. /Urgjent.com/