Një 19-vjeçar me shtetësi kosovare, është ndaluar nga Policia e Dortmundit në kuadër të një hetimi për përgatitjen e dyshuar të një krimi të rëndë që mund të rrezikojë sigurinë shtetërore. Gjatë kontrolleve në qytetin Hagen, policia ka sekuestruar pajisje për ruajtjen e të dhënave, ndërsa nuk janë gjetur armë. Gjykata ka miratuar kërkesën për mbajtjen e tij në ndalim policor afatgjatë.
Një 19-vjeçar me shtetësi kosovare, banues në qytetin Hagen të Gjermanisë, është ndaluar nga autoritetet policore në kuadër të hetimeve për përgatitjen e dyshuar të një krimi të rëndë që mund të rrezikojë sigurinë e shtetit.
Sipas njoftimit të Policisë së Dortmundit, të publikuar më 16 tetor 2026, ndaj të riut janë zhvilluar kontrolle të reja, ndërsa Gjykata e Qarkut në Hagen ka miratuar kërkesën e policisë për mbajtjen e tij në ndalim policor afatgjatë.Rasti është pjesë e një hetimi më të gjerë që ka nisur në fillim të tetorit, kur forcat speciale gjermane ndërhynë në qytetet Unna dhe Hagen, pas informacioneve të siguruara nga shërbimet e inteligjencës.
Në operacionin e zhvilluar më 1 tetor, rreth orës 19:30, policia kishte ndaluar fillimisht tre persona: një shtetas gjerman, atëherë të identifikuar si 33-vjeçar, dhe dy shtetas sirianë të moshës 20 dhe 24 vjeç.Autoritetet kishin njoftuar se ekzistonin dyshime që personat mund të ishin përfshirë në përgatitjen e një vepre penale që rrezikon sigurinë shtetërore.Dy shtetasit sirianë ishin liruar nga ndalimi policor më 2 tetor, pasi gjykata nuk e kishte miratuar kërkesën për mbajtjen e tyre për një periudhë më të gjatë. Ndërkohë, hetimet kishin vazhduar ndaj personave të përfshirë në këtë rast.Gjatë zhvillimit të mëtejshëm të hetimeve, Policia e Dortmundit ka identifikuar edhe 19-vjeçarin kosovar nga Hagen.Sipas njoftimit të përbashkët të Prokurorisë së Përgjithshme në Düsseldorf dhe Policisë së Dortmundit, ndaj tij ekziston dyshimi fillestar për tentativë të pjesëmarrjes në një marrëveshje për kryerjen e një krimi, sipas nenit 30, paragrafi 2, të Kodit Penal gjerman.Dyshimet lidhen me një vepër penale të paraparë në Ligjin gjerman për Kontrollin e Armëve të Luftës.
Gjatë kontrollit të zhvilluar më 16 tetor, hetuesit kanë sekuestruar pajisje për ruajtjen e të dhënave, të cilat po analizohen. Autoritetet kanë konfirmuar se gjatë kontrolleve nuk janë gjetur armë.Pas këtyre veprimeve, policia ka kërkuar nga gjykata në Hagen që 19-vjeçari të mbahet në ndalim policor për një periudhë më të gjatë. Kërkesa është miratuar nga gjykata, sipas njoftimit të dytë të publikuar po atë ditë.Masa e kërkuar për 19-vjeçarin ishte 14 ditë ndalim policor. Kjo masë është marrë për parandalimin e rrezikut të mundshëm dhe nuk përbën dënim penal apo vendim përfundimtar mbi fajësinë.Hetimet po zhvillohen nga Prokuroria e Përgjithshme në Düsseldorf, në bashkëpunim me Policinë e Dortmundit dhe autoritetet e tjera gjermane të sigurisë.Autoritetet nuk kanë publikuar hollësi të plota mbi planet e dyshuara, duke u arsyetuar me nevojën për të mos dëmtuar hetimet në vazhdim.Të gjithë personat e përfshirë në hetim gëzojnë prezumimin e pafajësisë deri në një vendim përfundimtar të organeve kompetente. /Urgjent.com/