LETËR NGUSHËLLIMI FAMILJES SHEJI!
“Të All-llahut jemi dhe tek ai do të kthehemi”.
Me dhimbje të thellë dhe me zemër të rënduar nga lajmi i hidhur, Myftiu i Strugës, H. Adi ef. Murtishi, në emër të nënpunësve të Myftinisë së BFI-së Strugë, të gjithë Imamëve dhe Xhematit tonë, shpreh ngushëllimet më të sinqerta dhe më të ndjera për ndarjen nga jeta të të riut Arbër Sheji nga Veleshta e Strugës.
Largimi i një të riu është plagë që dhemb ndryshe. Është dhimbje që prek zemrat e prindërve, të familjarëve, të shokëve dhe të gjithë njerëzve. Kur ndahet nga kjo botë një djalë i ri, shuhet një shpresë, një buzëqeshje, një e ardhme që pritej të ndërtohej. Por ne, si besimtarë, e dimë se çdo shpirt ka kohën e caktuar nga All-llahu i Madhëruar dhe se asgjë nuk ndodh pa urtësinë dhe caktimin e Tij.
All-llahu xh.sh. thotë në Kur’an:
“Çdo shpirt do ta shijojë vdekjen…”
Ky është realiteti i jetës sonë tokësore, një udhëtim i shkurtër drejt përjetësisë.
Në këto çaste të vështira, i lutemi All-llahut të Gjithëmëshirshëm që Arbërin ta mëshirojë, ta falë, ta bëjë prej banorëve të Xhennetit dhe ta vendosë në mesin e atyre që gëzojnë mëshirën e Tij të pakufishme.
Lusim Zotin që varri i tij të jetë kopsht prej kopshteve të Xhennetit dhe që takimi i tij me Krijuesin të jetë takim me falje e mëshirë.
Familjes Sheji, prindërve të tij, vëllezërve, motrave dhe të gjithë të afërmve, ju themi:
Durimi juaj në këto momente është dëshmi e besimit tuaj. Dhimbja është e madhe, por shpërblimi i durimtarëve tek All-llahu është edhe më i madh. Pejgamberi a.s. ka thënë se kur Allahu xh.sh e merr një rob të dashur nga familja e besimtarit dhe ai duron e shpreson shpërblimin, All-llahu xh.sh për të ndërton shtëpi në Xhennet.
Ngushëllime të sinqerta shokëve dhe miqve të tij, që sot ndjejnë boshllëkun e mungesës së tij. Kujtimet e mira, fjalët e mira dhe lutjet për të janë dhurata më e çmuar që mund t’i bëni atij tani.
Veleshta sot është në dhimbje. Struga sot është në dhimbje. Por mbi çdo dhimbje qëndron bindja jonë se jeta është amanet dhe se tek All-llahu xh.sh është kthimi ynë.
All-llahu e mëshiroftë Arbër Shejin, e faltë dhe e ngrittë në shkallët më të larta të Xhennetit.
All-llahu i dhëntë familjes së tij sabër, forcë dhe qetësi në zemrat e tyre.